Dit jaor viert ut Almense zwembad ut 90 jaorig bestaon
Ut graafwark is destieds deur de Almenaar’n zelf edaon
Op een zaoterdagmargen in de weie van ter Meulen
Hebt de mansluu met ut zand loop’n zeulen
Zo kwam dur bie de Barkel een groot gat
En kreeg Almen zien eigen zwembad

Ut olde kleedhokje zol niet meer neudig wèzen
“Ik spartel en blijf boven” stond durop te lèzen
Disse tekst kwam nog vake van pas
As dur weer discussie aover de zwembaad’n was
En was dur op menig moment gebrek an geld
Werd ut tekort deur de Almenaar’n zelf neer-eteld

Want ut zwemwater stroomt de Almenaar’n deur ut bloed
Ut zit in ut DNA van ut darp, besef dat goed
Kom ie an ut zwembad, dan wordt Almen fel
En a-j hier wat langer woont, snap ie dat wel
De parel van ut darp, met duuzend’n bezoekers overal vandan
“Ik spartel en blijf boven”, daor ku-j van op-an!